काठमाडौँ, ११ साउन - विगत तीन दिनदेखि परेको अविरल वर्षाका कारण पहिरोले घर पुरिएर मंगलवार बिहान एकै परिवारको तीन जनाको मृत्यु भएको छ।
मकवानपुरको पूर्व सदरमुकाम भीमफेदी गाविस ५ स्थित सोलाभन्ज्याङमा पहिरो गएर मनमाया स्याङतान घर पहिरोले पुरिंदा उनको ज्वाइँ, छोरी र नातीको मृत्यु भएको हो। पहिरोले घर पुरिएर मृत्यु हुनेमा २७ वर्षीय टेकवहादुर रुम्वा, २५ वर्षीय पार्वती रुम्वा र ६ वर्षीय विकास रुम्बा छन्।
इप्रका भीमफेदीका प्रहरी निरीक्षक वासुदेव थापाका अनुसार बिहान ३ बजेतिर सय फिटमाथिबाट खसेको पहिरोले घर पुरिएको थियो। नम्बर १ जगदल गणका सैनिक र इप्रका भीमफेदी प्रहरी टोलीले पहिरो पन्छाएर मृतकहरुको शव बाहिर निकालेका थिए। घरमा भएका सवै खाद्यान्न, लताकपडा र नगद पनि पुरिएको छ। नगद रकमको खोजी भइरहेको स्थानीयबासीले बताए।
ज्वाईँ छोरीलाई घरमा राखेर मनमाया गोठमा बसेकाले उनलाई भने केही पनि भएको छैन।
0 comments:
Post a Comment