असार २३, २०७३- मानवताको विषयमा संवेदनशील भनेर प्रचार गरिएका क्यानडेली प्रधानमन्त्री जस्टिन टुन्ड्रोले आफगान घटनामा परेका नेपालीप्रति भने त्यस्तो संवेदनशीलता देखाउन कन्जुस्याइँ गरिरहेका छन् ।
अफगानिस्तानमा रहेको क्यानडेली दूतावासको सुरक्षामा खटिएका नेपालीहरू आतंककारी आक्रमणमा परी मारिएको घटनाबारे ट्विट गर्दै दु:ख व्यक्त गरेका भए पनि क्षतिपूर्ति दिने सवालमा भने नेपाल सरकारले गरिरहेको प्रयासलाई उनको सरकारले सुनेको छैन
दुई साताअघि (असार ६ गते) अफागानिस्तानमा नेपाली सुरक्षा गार्ड चढेको बसमा बम हमला हुँदा १३ नेपालीको निधन भएको थियो । उनीहरू बेलायती कम्पनी साब्रे इन्टरनेसनल अन्तर्गत रहेर क्यानडेली दूतावासको सुरक्षामा खटिएका थिए । उक्त कम्पनीले क्यानडा सरकारसँग सम्झौता गरेर उनीहरूलाई सुरक्षामा खटाएको थियो ।
कम्पनीबाट पाउने सेवा सुविधाबाहेक अन्य थप क्षतिपूर्तिका लागि नेपालले क्यानडेली सरकारसँग आग्रह गरेको हो ।
क्यानडाका लागि नेपाली राजदूत कालीप्रसाद पोखरलले उच्चस्तरको भेट नपाउँदा क्षतिपूर्ति दिलाउने कुरामा समस्या परिरहेको परराष्ट्र मन्त्रालयका अधिकारी बताउँछन् । घटना भएको भोलिपल्टै परराष्ट्र मन्त्रालयले दिल्लीस्थित क्यानडेली नियोगसँग नेपाली दूतावासले छलफल अघि बढाएको भए पनि ठोस उपलब्धि हासिल भएको छैन ।
अहिलेसम्म नेपालले क्षतिपूर्तिका लागि क्यानडासँग मौखिक कुरा गरे पनि लिखित रूपमा पत्राचार समेत गरेको छैन । परराष्ट्र स्रोतका अनुसार परराष्ट्र मन्त्री र सचिवस्तरबाट पनि क्षतिपूर्तिका लागि कूटनीतिक पहल भइरहेको छ ।ekantipur
0 comments:
Post a Comment