फिफा फुटबल बरियतामा नेपाल ६ स्थान तल, वेल्सको छलाङ

काठमाडौं, असार ३० – विश्व फुटबल बरियतामा नेपाल ६ स्थान तल झरेको छ । फिफाले सार्वजनिक गरेको नयाँ बरियता अनुसार नेपाल ६ स्थान तल झर्दै १ सय ८८ औं स्थानमा पुगेको हो ।

दक्षिण एसियामा भने नेपाल पाँचौ स्थानमा छ । १ सय ५० औं स्थानमा रहँदै अफगानिस्तान दक्षिण एसियामा पहिलो स्थानमा छ । भारत १ सय ५२ औँ, माल्दिभ्स १ सय ७४ औँ र बंगलादेश १ सय ८३ औँ स्थानमा छन् । यस्तै भुटान १ सय ९२ औँ, श्रीलंका १ सय ९३ औँ र पाकिस्तान १ सय ९४ औँ स्थानमा छन् ।

वरियतामा गएको महिनाभन्दा १५ स्थान माथि चढ्दै वेल्स ११ औँ स्थानमा उक्लिएको छ । फ्रान्सले पनि पहिले भन्दा १० स्थान सुधार गर्दै सातौँ स्थानमा पुगेको छ । वेल्स युरो कप २०१६ को सेमिफाइनल र फ्रान्स फाइनल पुगेकाले वरियतामा सुधार भएको हो ।

यस्तै गएको महिनाभन्दा दुई स्थान माथि चढ्दै पोर्चुगल छैठौँ स्थानमा उक्लिएको छ । स्पेन र ब्राजिल भने पहिले भन्दा दुई स्थान तल झरेका छन् । यस्तै न्यूजिल्याण्डले सबैभन्दा राम्रो सुधार गरेर ५४ स्थान माथि उक्लँदै ९३ औँ स्थानमा पुगेको छ । यसै वर्षदेखि फिफा वरियतामा स्थान पाएको कोसोभो १ सय ९० औँ स्थानमा छ ।