केसीको अनसनमा बि पी प्रतिष्ठानका विद्यार्थीको ऐक्यबद्धता

धरान— चिकित्साशास्त्र अध्ययन संस्थानका चिकित्सक डा.गोविन्द केसीको आठौं आमरण अनशनमा बि पी कोइराला स्वास्थ्य विज्ञान प्रतिष्ठान धरानमा अध्ययनरत विद्यार्थीहरुलेपनि ऐक्यबद्धता जनाएका छन् ।
डा.केसीका अघिल्ला अनशनहरुमा समेत साथ दिंदै आएका प्रतिष्ठानका विद्यार्थीहरुको ‘प्रा.डा.गोविन्द केसी ऐक्यबद्धता समूह’ले बुधबार साँझ प्रतिष्ठानको जिओपिडी भवन अगाडी ‘आई एम विथ जि केसी’ लेखेर मैनवत्ती बाली ऐक्यबद्धता जनाएका हुन् ।
आफ्नो परिक्षाको बेलापनि समय निकाले अनशन अवधिभर दैनिक मैनवत्ती बाली ऐक्यबद्धता जनाउने उनीहरुले बताएका छन् ।
उनीहरुले जारी गरेको विज्ञप्तीमा भनिएको छ ‘‘नेताहरु बिरामी हुँदा विदेशका महँगा अस्पताल पुग्लान् तर कर्णालीमा सिटामोल कहिले पुग्ने ? माफियाहरुको सञ्जालबाट मेडिकल क्षेत्र मुक्त गर्न, गुणस्तरीय मेडिकल शिक्षा प्रदान गर्न, माथेमा प्रतिवेदन र चिकित्सा शिक्षा ऐन कार्यान्वयनमा विलम्ब नगरी विश्वासीलो एवं गुणस्तरीय स्वास्थ्य सेवा तथा मेडिकल शिक्षाको निम्ति हामी डा.केसीको साथमा छौं ।’’
विद्यार्थीहरुले डा.केसीमा मागलाई वेवास्ता नगर्न र आफुहरुको कदमलाई आगोको सानो झिल्को नठान्न पनि सरकरलाई चेतावनी दिएका छन् ।